கே.டி.எம்., மோட்டார் சைக்கிள்கள்; பஜாஜ் ஆட்டோ அறிமுகம் செய்கிறது
புனே : புனேவைச் சேர்ந்த, பஜாஜ் ஆட்டோ நிறுவனம், கே.டி.எம்., ஆர்.சி., வரிசையில், இரண்டு மோட்டார் சைக்கிள்களை அறிமுகப்படுத்தி உள்ளது.
இது குறித்து, இந்நிறுவனத்தின், சிறப்பு வாகனங்கள் பிரிவின் தலைவர் அமித் நந்தி கூறியதாவது: கே.டி.எம்., ஆர்.சி., வரிசையில், ஆர்.சி., 390 மற்றும் ஆர்.சி., 200 என, இரு வகை மோட்டார் சைக்கிள்களை அறிமுகப்படுத்தி உள்ளோம். ஆர்.சி., 390 வாகனத்தின் விலை, 2.25 லட்சம் ரூபாய்; ஆர்.சி., 200 மாடல் விலை, 1.71 லட்சம் ரூபாய் என, நிர்ணயிக்கப்பட்டு உள்ளது. அடுத்த நிதியாண்டுக்குள், கே.டி.எம். விற்பனைக்கு என, 125 பிரத்யேக மையங்களை அமைக்க திட்டமிட்டு உள்ளோம்.
இதுவரை, ஐரோப்பிய மோட்டார் பைக் நிறுவனமான, கே.டி.எம்., உடன் இணைந்து, ஒரு லட்சம், கே.டி.எம்., வாகனங்களை விற்பனை செய்துள்ளோம். இதில், 37 ஆயிரம் வாகனங்கள், 2016ல் விற்பனை செய்யப்பட்டுள்ளது குறிப்பிடத்தக்கது. கடந்த ஆண்டு, இருசக்கர வாகன துறையின் வளர்ச்சி, 4.3 சதவீதமாகவும், நிறுவனத்தின், பந்தயம் மற்றும் விளையாட்டு வாகன பிரிவின் வளர்ச்சி, 20 சதவீதமாகவும் உள்ளது. பண மதிப்பு நீக்க நடவடிக்கையால், கடந்த இரு மாதங்களாக, விற்பனையில் ஏற்பட்ட பாதிப்பு, தற்போது சீரடைந்துள்ளது. இவ்வாறு அவர் கூறினார்.