ஷங்கரின் 'கேம் சேஞ்சர்' - 'ஜரகண்டி' பாடல், பிரம்மாண்டம் மட்டுமா ?

ஷங்கர் இயக்கத்தில் தமன் இசையமைப்பில் ராம் சரண், கியாரா அத்வானி மற்றும் பலர் நடிப்பில் உருவாகி வரும் படம் 'கேம் சேஞ்சர்'. இப்படத்தின் முதல் சிங்கிளான 'ஜரகண்டி' பாடல் நேற்று ராம் சரணின் பிறந்தநாளை முன்னிட்டு வெளியானது.

கடந்தாண்டு இப்பாடல் ஆன்லைனில் லீக் ஆனது. அதன்பின் தீபாவளிக்கு பாடலை வெளியிடுகிறோம் என அறிவித்தார்கள். ஆனால், வெளியிடாமல் தள்ளி வைத்தார்கள். நேற்றுதான் இப்பாடல் வெளியானது.

ஷங்கரின் வழக்கமான பிரம்மாண்டம் இந்தப் பாடலில் இடம் பெற்றுள்ளது. ஒரு ஊரில் உள்ள வீட்டுக்கே கலர் கலராக பெயின்ட் அடித்து வைத்திருக்கிறார். கிராபிக்ஸ் தொழில்நுட்பமும் பாடலில் பயன்படுத்தப்பட்டுள்ளது. எண்ணற்ற டான்சர்கள் பாடலில் இடம் பெற்றுள்ளார்கள். இப்பாடல் மட்டுமே 15 கோடி செலவில் எடுக்கப்பட்டுள்ளது என்கிறார்கள்.

இயக்குனர் ஷங்கரின் வேண்டுகோளுக்கிணங்க பிரபுதேவா இப்பாடலுக்கு நடனம் அமைத்துக் கொடுத்துள்ளார். இப்பாடலைப் பற்றி பலவிதமான கமெண்ட்டுகள் வந்தாலும் யு டியூப் டிரென்டிங்கில் நம்பர் 1 இடத்திலும் 42 லட்சம் பார்வைகளையும் இதுவரை கடந்துள்ளது.