மம்முட்டி - ஜோதிகாவின் காதல் பட செகண்ட் லுக் வெளியானது

நடிகை ஜோதிகா கடந்த சில வருடங்களுக்கு முன்பு 36 வயதினிலே படம் மூலம் தனது இரண்டாவது இன்னிங்ஸை வெற்றிகரமாக துவங்கினார். தொடர்ந்து தமிழில் மட்டுமே கவனம் செலுத்தி நடித்து வந்தவர், சமீப காலமாக மலையாளம் மற்றும் ஹிந்தி ஆகிய மொழிகளிலும் படங்களில் நடிக்க துவங்கியுள்ளார். கடந்த வருடம் மலையாளத்தில் மம்முட்டிக்கு ஜோடியாக காதல் ; தி கோர் என்கிற படத்தில் நடிக்க ஒப்பந்தமானார் ஜோதிகா. கிட்டத்தட்ட 25 வருட இடைவெளிக்கு பிறகு இவர் மீண்டும் மலையாளத்தில் நடிக்கும் படம் இது. 'தி கிரேட் இந்தியன் கிச்சன்' படத்தை இயக்கிய ஜியோ பேபி தான் இந்த படத்தை இயக்குகிறார்.

இந்த படத்தின் படப்பிடிப்பு முடிவடைந்து தற்போது போஸ்ட் புரொடக்ஷன் பணிகள் நடைபெற்று வருகின்றன. இந்த நிலையில் இந்த படத்தின் செகண்ட் லுக் போஸ்டர் தற்போது வெளியாகி உள்ளது. இந்த போஸ்டரில் மம்முட்டியும் ஜோதிகாவும் ஒருவரை ஒருவர் சீரியஸாக பார்த்தபடி அமர்ந்திருப்பது போன்று உருவாக்கப்பட்டுள்ளது. காதல் என டைட்டில் வைக்கப்பட்டிருந்தாலும் இந்த படம் அரசியல் பின்னணியில் உருவாகி இருப்பதாக சொல்லப்படுகிறது.