பிப்ரவரி 24-ல் மும்முனையா... நான்குமுனையா...?!

2017ம் ஆண்டு ஆரம்பித்த பின் முதல் 7 வெள்ளிக் கிழமைகளில் மிகக் குறைவான படங்களே வெளிவந்தன. கடந்த வாரம் பிப்ரவரி 17ம் தேதி 7 படங்கள் வெளிவரும் என்று எதிர்பார்க்கப்பட்டது. கடைசியில் 5 படங்கள் மட்டுமே வெளிவந்தது.

இந்த வெள்ளிக்கிழமை பிப்ரவரி 24ம் தேதி 'மொட்ட சிவா கெட்ட சிவா, யமன், முத்துராமலிங்கம், கனவு வாரியம்' ஆகிய படங்கள் வெளியாகும் என்று அறிவிக்கப்பட்ட நிலையில் 'மொட்ட சிவா கெட்ட சிவா' படம் வெளிவராது என்று தகவல் வெளியாகியுள்ளது.

படத்திற்கு பைனான்ஸ் கொடுத்தவர்கள் தங்களுக்குச் சேர வேண்டிய பணத்தைக் கொடுத்தாக வேண்டும் என்று கட்டாயப்படுத்திய சூழ்நிலையில் இந்தப் படம் மேலும் தள்ளிப் போக வாய்ப்புகள் அதிகம் என்கிறார்கள். கடந்த வாரம் 17ம் தேதியே இப்படம் வெளியாகும் என்று அறிவிக்கப்பட்டு கடைசி நேரத்தில் இந்த வாரத்திற்கு படத்தைத் தள்ளி வைத்தார்கள். இப்போது அதுவும் நடக்குமா என்பது சந்தேகமே. அதனால், வரும் வெள்ளியன்று நான்கு முனைப் போட்டி இல்லாமல் மும்முனைப் போட்டிதான் இருக்கும் என்று எதிர்பார்க்கப்படுகிறது.

ராகவா லாரன்ஸ் நடித்துள்ள 'மொட்ட சிவா கெட்ட சிவா' படம் இந்த வாரம் வெளிவராமல் போனால், அவர் நடித்து முடித்துள்ள மற்றொரு படமான 'சிவலிங்கா' படம் திரைக்கு வருவதில் மேலும் தாமதமாகும் சூழ்நிலை ஏற்பட்டுள்ளது.