கனடா க்யூபெக் நகரில் உலகின் மிகப்பெரிய குளிர்காலத் திருவிழா.

கனடா நாட்டின் மிகப்பெரிய மாகாணம் க்யூபெக். ‘ஃப்ரெஞ்சு' மொழியை அதிகாரப்பூர்வமான மொழியாகக் கொண்டுள்ள இந்த மாகாணத்தின் முக்கிய நகரங்களில் ஒன்று க்யூபெக் நகரம்.

செய்ண்ட் லாரன்ஸ் நதிக்கரையில் அழகாக வீற்றிருக்கும் க்யூபெக் நகரில் ஒவ்வொரு வருடமும் குளிர்காலத்தில் பிரமாண்டமான திருவிழா நடைபெறும். உலகிலுள்ள பல நாடுகளிலிருந்து சுமார் ஐந்து முதல் பத்து லட்சம் மக்கள் இந்தத் திருவிழாவில் பங்கேற்கின்றனர். குளிர்காலத்தில் மக்கள் அதிகம் வெளியேறாமல் வீட்டிற்குள்ளேயே முடங்கிக் கிடப்பதை மாற்றவே 1894ல் தன்முறையில் இந்தக் குளிர்காலத் திருவிழா நடத்தப்பட்டது. இரண்டு உலகப் போர்களும் நடந்தபோது நிறுத்தி வைக்கப்பட்டிருந்த இந்தத் திருவிழா, இந்த ஆண்டு தனது பிளாட்டினம் ஆண்டை (70ஆம் ஆண்டு) கோலாகலமாக கொண்டாடியது. ஜனவரி 25ஆம் நாள் தொடங்கி பிப்ரவரி 11ஆம் நாள் முடிவடைந்தது.

போன்ஹோமும் பனி மாளிகையும்..

ஒலிம்பிக் போட்டிகளுக்கு 'மாஸ்கோட்' எனப்படும் சின்னம் இருப்பதுபோல் இந்த க்யூபெக் திருவிழாவிற்கும் ஒரு சின்னம் உள்ளது. குளிர்காலத்தைப் புன்னகையுடன் வரவேற்கும் விதத்தில் சிரித்த முகத்துடன் இருக்கும் 'ஸ்னோமேன்' பொம்மைதான் போன்ஹோம். இதற்கு ப்ரெஞ்சு மொழியில் 'நல்ல மனிதன்' எனப் பொருள். இந்தப் பனி மனிதன் வசிக்கும் பனி மாளிகையை ஒவ்வொரு வருடமும் பிரமாண்டமாக உருவாக்குகின்றனர். வரவேற்பு நிகழ்வுகள் நடைபெறும் இ மாளிகையை இரண்டாயிரம் பனிக்கட்டிகள் கொண்டு வடிவமைக்கின்றனர். ஒவ்வொரு பனிக்கட்டியும் கிட்டத்தட்ட நூறு கிலோ எடை கொண்டது.

நூற்றுக்கும் மேற்பட்ட பொழுதுபோக்கு அம்சங்கள்..

'ஸ்னோ ட்யூப்' எனப்படும் வட்டமான ட்யூப்களில் பனிச்சறுக்கு செய்வது, 'ஸ்கேட்டிங்' எனப்படும் பனிச்சறுக்கு விளையாட்டு, பனியில் ஆங்காங்கே அமைக்கப்பட்டுள்ள சிறிய துளைகளின் வழியாகத் தூண்டில் போட்டு மீன் பிடிப்பது, 'ஸ்லெட்' எனப்படும் மரக்கட்டை வண்டிகளை நாய்கள் இழுத்துச் செல்ல அதில் சவாரி செய்வது, பனியில் வேகமாக ஓடும் குதிரை வண்டிகளில் சவாரி, 150 அடி உயரமுள்ள பனிச்சறுச் மரங்களில் விளையாடுவது, கனடா நாட்டின் புகழ்பெற்ற புட்டின், மேபிள் சிரப் போன்ற உணவு வகைகளைச் சுவைப்பது, பல்வேறு வகையான பனி விளையாட்டுப் போட்டிகளில் கலந்து கொள்வது என நூற்றுக்கும் மேற்பட்ட பொழுதுபோக்கு அம்சங்களை இந்தத் திருவிழாவில் காண முடியும்.

இவற்றைத் தவிரத் திருவிழாவின் ஒவ்வொரு சனிக்கிழமையும் வண்ணமயமான இரவுநேர அணிவகுப்பு •நடைபெறும். அரை மணி நேரம் நடைபெறும் இந்த அணிவகுப்பில் முந்நூற்றுக்கும் மேற்பட்ட இசை, நடனம் மற்றும் உடற்பயிற்சி கலைஞர்கள் தங்கள் திறமைகளால் மக்களை மகிழ்விக்கின்றனர்.

உலகப் புகழ்பெற்ற இந்த க்யூபெக் குளிர்காலத் திருவிழா அடுத்த ஆண்டு பிப்ரவரி 7 முதல் 16 வரை நடைபெறவுள்ளது. ஒரு டிக்கெட்டின் விலை இந்திய மதிப்பில் 600 முதல் 900 ரூபாய்.