கருவின் வயதைத் துல்லியமாகக் கண்டறியப் புதிய செயற்கை நுண்ணறிவு மாதிரி உருவாக்கிய சென்னை ஐஐடி ஆராய்ச்சியாளர்கள் சாதனை.

கருவின் வயதைக் கண்டறியும் புதிய செயற்கை நுண்ணறிவு மாதிரியை சென்னை ஐஐடி ஆராய்ச்சியாளர்கள் உருவாக்கி சாதனை படைத்துள்ளனர். கர்ப்பிணிகளின் உடல்நலத்தைக் கவனித்துக் கொள்ளவும், பிரசவத் தேதியைச் சரியாக நிர்ணயிக்கவும், கரு எப்போது உருவானது என்பதை, அதாவது கருவின் வயதைத் துல்லியமாகக் கணக்கிடுவது அவசி யம்.

இன்றைய காலகட்டத்தில், மேற்கத்திய மக்களுக்காக உருவாக்கப்பட்ட நடைமுறையைப் பின்பற்றி கருவின் வயது தீர்மானிக்கப்படுகிறது. ஆனால், கருவின் வளர்ச்சியில் மாறுபாடு இருக்கும் பட்சத்தில், இந்தக் கணக்கீடு தவறாக அமையவும் வாய்ப்பு உள்ளது.

இந்நிலையில், 3 மாதக் கர்ப்பிணியின் வயிற்றில் வளரும் கருவின் வயதைத் துல்லியமாகக் கண்டறியும் வகையில், சென்னை ஐஐடியின் உயிரித் தொழில்நுட்பத் துறை, ஹரியாணா மாநிலம் ஃபரீதாபாத் தில் உள்ள ‘திஸ்டி’ மருத்துவ அறிவியல், தொழில்நுட்ப நிறுவனத்துடன் இணைந்து உயர்நிலை ஆராய்ச்சிக்கான குழுவை அமைத்தது.

இந்த ஆராய்ச்சியின் முடிவில், ‘கர்ப்பிணி-ஜிஏ2’ எனப்படும் இந்தியாவுக்கான பிரத்தியேகச் செயற்கை நுண்ணறிவு மாதிரியை ஆராய்ச்சியாளர்கள் உரு வாக்கியுள்ளனர். 3 மாதக் கருவின் வயதைக் கண்டறிய, இந்திய மக்கள்தொகை தரவை பயன்படுத்தி, முதன்முதலாக இந்த மதிப்பீட்டு மாதிரி உருவாக்கப்பட்டுள்ளது.

சென்னை ஐஐடி முக்கிய பங்கு வகிக்கிறது

 இது, மருத்துவ ரீதியாக இந்தியக் கருவின் வயதை துல்லியமாக மதிப்பிடுவதுடன், 3 மடங்கு பிழைகளையும் குறைக்கிறது. இந்த மாதிரியைப் பயன்படுத்தி மகப்பேறு மருத்துவர்கள், சிசு பராமரிப்பியல் மருத்துவர்கள் குழந்தை பராமரிப்பை மேம்படுத்த முடியும். தாய் - சேய் உயிரிழப்பு விகிதத்தையும் குறைக்க முடியும்.

இந்த ஆராய்ச்சிக்கு மத்திய உயிரித் தொழில்நுட்பத் துறைச் செயலர் ராஜேஷ் கோகலே வரவேற்பும், பாராட்டும் தெரிவித்துள்ளார். அவர் கூறும்போது, ‘‘இது உயிரி தொழில் நுட்பத் துறையின் முதன்மையான திட்டம். கருவின் வயதை மதிப் பிடுவதற்கான மக்கள்தொகை சார்ந்த மாதிரிகளை உருவாக்குவது பாராட்டத்தக்கது’’ என்றார்.

இந்த ஆராய்ச்சியின் முக்கியத் துவம் குறித்து ஐஐடி உயிரித் தொழில்நுட்பத் துறை பேராசிரியர் ஹிமான்சு சின்ஹா கூறியபோது, ‘‘இந்தியாவில் பொதுச் சுகாதாரத்தை மேம்படுத்துவதில் சென்னை ஐஐடி முக்கிய பங்கு வகிக்கிறது. செயற்கை நுண்ணறிவு நுட்பங்களைப் பயன்படுத்தி, மேற்கத்திய மக்களுக்காக வடிவமைக்கப்பட்ட மாதிரிகளுக்குப் பதிலாகத் துல்லியமாக இந்தியக்கருவின் வயதைக் கணிக்கும் கருவிகளை உருவாக்க முயன்று வருகிறோம். அதற்கான மாதிரிகளை உருவாக்குவதே இந்த ஆராய்ச்சியின் முதல்படி’’ என்றார்.