சின்கியுபீல்ட் கோப்பை செஸ்: தமிழக வீரர் குகேஷ் முதல் வெற்றி

செயின்ட் லூயிஸ், கிராண்ட் செஸ் சுற்றுப்பயணத்தின் ஒரு அங்கமான சின்கியுபீல்ட் கோப்பை செஸ் போட்டி அமெரிக்காவில் உள்ள செயின்ட் லூயிஸ் நகரில் நடந்து வருகிறது. இதில் பங்கேற்றுள்ள 10 வீரர்கள் தங்களுக்குள் தலா ஒரு முறை மோத வேண்டும். லீக் சுற்று முடிவில் முதலிடத்தை பிடிக்கும் வீரர் சாம்பியன் பட்டத்தை கைப்பற்றுவார். இதில் நேற்று முன்தினம் இரவு நடந்த 2-வது சுற்று ஆட்டம் ஒன்றில் தமிழகத்தை சேர்ந்த குகேஷ், உஸ்பெகிஸ்தானின் நோடிர்பெக் அப்துசத்தோரோவை சந்தித்தார். வெள்ளைநிற காய்களுடன் ஆடிய உலக சாம்பியனான குகேஷ் 50-வது நகர்த்தலில் அப்துசத்தோரோவை தோற்கடித்தார். முதல் சுற்றில் இந்தியாவின் பிரக்ஞானந்தாவிடம் தோல்வியை தழுவிய குகேசுக்கு இது முதல் வெற்றியாகும்.