சென்னை கிராண்ட்மாஸ்டர்ஸ் செஸ்: விதித் குஜராத்தியை வீழ்த்திய கார்த்திகேயன்

3-வது சென்னை கிராண்ட்மாஸ்டர்ஸ் செஸ் போட்டி சென்னை தேனாம்பேட்டையில் நடந்து வருகிறது. 9 சுற்றுகளை கொண்ட இந்த போட்டி மாஸ்டர்ஸ், சேலஞ்சர்ஸ் என இரு பிரிவாக நடத்தப்படுகிறது. நேற்று 7-வது சுற்று நடந்தது. மாஸ்டர்ஸ் பிரிவில் ஒரு ஆட்டத்தில் கருப்புநிற காய்களுடன் ஆடிய இந்திய வீரர் கார்த்திகேயன் முரளி 71-வது நகர்த்தலில் சக நாட்டவரான விதித் குஜராத்தியை சாய்த்தார். அர்ஜூன் எரிகைசி (இந்தியா) - அனிஷ் கிரி (நெதர்லாந்து), பிரணவ் (இந்தியா) - ஜோர்டன் வான் பாரஸ்ட் (நெதர்லாந்து) இடையிலான ஆட்டங்கள் டிராவானது. மற்ற ஆட்டங்களில் நிஹால் சரின் (இந்தியா), ராய் ராப்சனையும் (அமெரிக்கா), வின்சென்ட் கீமர் (ஜெர்மனி), அவோன்டர் லியாங்கையும் (அமெரிக்கா) தோற்கடித்தனர். 7-வது சுற்று முடிவில் வின்சென்ட் கீமர் 5½ புள்ளிகளுடன் முதலிடத்திலும், அர்ஜூன் எரிகைசி, கார்த்திகேயன் முரளி தலா 4 புள்ளிகளுடன் 2-வது இடத்திலும் உள்ளனர். சேலஞ்சர்ஸ் பிரிவில் ஹர்ஷவர்தன் 75-வது நகர்த்தலில் ஹரிகாவுக்கு அதிர்ச்சி அளித்து 2-வது வெற்றியை பெற்றார். இதே போல் பிரனேஷ் 76-வது நகர்த்தலில் ஆர்.வைஷாலியை வீழ்த்தினார். லியோன் லுக் மென்டோன்கா, தீப்தயன் கோசை வென்றார். அபிமன்யு புரானிக் - ஆர்யன் சோப்ரா, அதிபன் - இனியன் இடையிலான ஆட்டங்கள் ‘டிரா’வில் முடிந்தது. இன்று 8-வது சுற்று ஆட்டங்கள் பிற்பகல் 3 மணிக்கு தொடங்கி நடைபெறும்.