மத்திய அமைச்சர் அனந்தகுமார் உடல் நல குறைவால் காலமானார்!

கர்நாடக மாநிலத்தைச் சேர்ந்த மத்திய அமைச்சர் அனந்தகுமார் உடல் நலக்குறைவால் காலமானார்.

 கடந்த நாடாளுமன்ற தேர்தலில் பெங்களூரு தெற்கு தொகுதியில் போட்டியிட்டு எம்.பி.யாக தேர்ந்தெடுக்கப்பட்டவர் அனந்தகுமார்.  கடந்த 2 மாதங்களுக்கு முன்பு அவர் புற்றுநோயால் அவதிப்பட்டார். அமெரிக்காவில் உள்ள மருத்துவ மனையில் சிகிச்சை பெற்ற பின்னர் உடல்நலம் சீரானது.

இந்த நிலையில் மத்திய அமைச்சர் அனந்தகுமாருக்கு மீண்டும் உடல் நலக்குறைவு ஏற்பட்டது. இதைத் தொடர்ந்து அவர் பெங்களூருவில் உள்ள தனியார் மருத்துவமனையில் அனுமதிக்கப்பட்டு சிகிச்சை பெற்று வந்தார். அமைச்சர் அனந்தகுமார் அதிகாலை 2 மணியளவில் சிகிச்சை பலனின்றி காலமானதாக தெரிவிக்கப்பட்டு உள்ளது. 

மறைந்த மத்திய அமைச்சர் ஆனந்தகுமார் மறைவால் மிகவும் துயரம் அடைந்துள்ளதாக பிரதமர் நரேந்திர மோடி இரங்கல் தெரிவித்து உள்ளார்.

மத்திய அமைச்சர் அனந்தகுமார் மறைவுக்கு மத்திய அமைச்சர்கள் நிர்மலா சீதாராமன், சதானந்த கவுடா உள்ளிட்டோர் இரங்கல் தெரிவித்து உள்ளனர்.

 எனது நண்பர் அனந்தகுமார் மறைவு எனக்கு அதிர்ச்சி அளிக்கிறது என சதானந்த கவுடா இரங்கல் தெரிவித்துள்ளார். பெங்களூரு வளர்ச்சியை தனது உயிர் மூச்சாக கருதி பணியாற்றியவர் அனந்தகுமார் என மத்திய அமைச்சர் நிர்மலா சீதாராமன் இரங்கல் தெரிவித்து உள்ளார்.