உலகக் கோப்பை தகுதிச்சுற்று: லயோனல் மெஸ்ஸி விலகல்

உலகக் கோப்பை கால்பந்து போட்டிக்கான தகுதிச்சுற்று ஆட்டத்தில் ஆர்ஜென்டீனாவும், வெனிசூலாவும் மோதவுள்ளன.

இந்த ஆட்டத்திலிருந்து ஆர்ஜென்டீனா வீரர் லயோனல் மெஸ்ஸி விலகியுள்ளார். இடுப்புப் பகுதியில் ஏற்பட்ட காயம் காரணமாக அவர் இந்த முடிவை எடுத்துள்ளார். இது தொடர்பாக ஆர்ஜென்டீனா பயிற்சியாளர் எட்கார்டோ பெளஸா கூறுகையில், "துரதிருஷ்டவசமாக மெஸ்ஸியால் இந்த ஆட்டத்தில் விளையாட முடியாமல் போய்விட்டது. அவருடைய விஷயத்தில் மிகவும் கவனமாக இருக்க விரும்புகிறோம். அவருடைய காயம் குறித்து மருத்துவரிடம் கலந்தாலோசித்தோம். அவரை மிகவும் கவனமாக பார்த்துக் கொள்வது முக்கியமானது' என்றார்.

கடந்த வியாழக்கிழமை நடைபெற்ற உருகுவேக்கு எதிரான தகுதிச்சுற்றில் மெஸ்ஸி அடித்த கோலால் வெற்றி கண்ட ஆர்ஜென்டீனா, புள்ளிகள் பட்டியலில் முதலிடத்தைப் பிடித்தது குறிப்பிடத்தக்கது.