பாகிஸ்தான் நடிகர்கள் இந்திய படங்களில் நடிக்க தடை!

மும்பை: பாகிஸ்தான் நடிகர்கள் இந்திய படங்களில் நடிக்க தடை விதிக்கப்படுவதாக இந்திய திரைப்பட தயாரிப்பாளர் சங்கம் அறிவித்துள்ளது.

இந்தியா - பாகிஸ்தான் சர்வேதேச கட்டுப்பாட்டு பகுதிக்கு அப்பால் உள்ள பயங்கரவாத முகாம்கள் மீது இந்திய ராணுவம் தாக்குதல் நிகழ்த்தியதையடுத்து, பாகிஸ்தான் பதிலடி கொடுக்கக் கூடும் என்ற எதிர்பார்ப்பின்பேரில் ஜம்மு-காஷ்மீர் மற்றும் பஞ்சாப் மாநிலங்களை ஒட்டியுள்ள எல்லை கிராமங்களிலிருந்து பொதுமக்கள் பாதுகாப்பான இடங்களுக்கு அப்புறப்படுத்தப்பட்டனர். இதனால் எல்லை பகுதிகளில் பதற்றமான சூழ்நிலை உருவாகியுள்ளது. பாதுகாப்பு பணியில் ராணுவம் உஷார் படுத்தப்பட்டுள்ளது.

இந்நிலையில் இந்திய திரைப்பட தயாரிப்பாளர் சங்கம், பாகிஸ்தான் நடிகர்கள் இந்திய திரைப்படங்களில் நடிக்க தடை விதித்துள்ளது. இந்தியா, பாகிஸ்தான் இடையே இயல்பு நிலை திரும்பும் வரை பாகிஸ்தான் நடிகர்கள் இந்திய படங்களில் நடிக்க தடை நீடிக்கும் எனவும் தெரிவித்துள்ளது. மேலும், பாகிஸ்தான் தொழில்நுட்ப கலைஞர்களுக்கும் இந்த தடை பொருந்தும் என கூறப்பட்டுள்ளது. இந்த தீர்மானம் இந்திய திரைப்பட தயாரிப்பாளர் சங்கத்தில் ஒரு மனதாக நிறைவேற்றப்பட்டது.