கார் மீது பயங்கரமாக மோதிய விமானம்: உடல் நசுங்கி பலியான பெண் (வீடியோ இணைப்பு)

கலிபோர்னியா மாகாணத்தில் உள்ள San Diego நகர் நெடுஞ்சாலையில் தான் இந்த துயர சம்பவம் நிகழ்ந்துள்ளது.

நேற்று காலை 9.15 மணியளவில் நெடுஞ்சாலை ஓரமாக கார் ஒன்று நின்றுள்ளது. இதில் 38 வயதான பெண் உள்பட 4 பேர் அமர்ந்திருந்துள்ளனர்.

அப்போது சிறிய ரக விமானம் ஒன்று வேகமாக தாழ்வான உயரத்தில் பறந்து வந்துள்ளது.

விமானியின் கட்டுப்பாட்டை இழந்த அந்த விமானம் சாலையில் தரையிறங்கி அசுர வேகத்தில் பாய்ந்து காரின் பின்புறத்தில் பலமாக மோதியுள்ளது.

இந்த விபத்தில் காரில் இருந்த 38 வயதான பெண் சம்பவ இடத்திலேயே உடல் நசுங்கி உயிரிழந்தார். காரில் இருந்த மற்ற 3 நபர்கள் மிதமான காயங்களுடன் மருத்துவமனையில் அனுமதிக்கப்பட்டுள்ளனர்.

அதேசமயம், 60 வயதான விமானியின் தலையில் பலமாக காயம் ஏற்பட்டுள்ளதால், ஆபத்தான நிலையில் அவர் தற்போது மருத்துவமனையில் சிகிச்சை பெற்று வருகிறார்.

இந்த விபத்தினை நேரில் பார்த்த நபர் ஒருவர் கூறுகையில், ‘விமானம் தாழ்வாக பறந்து வந்தபோது, அதன் சக்கரங்கள் சரியாக வெளியே வராததால் இந்த விபத்து ஏற்பட்டிருக்கலாம்’ என தெரிவித்துள்ளார்.

எனினும், கார் மீது சிறிய ரக விமானம் எப்படி மோதியது என்பது உள்ளிட்ட தகவல்கள் உறுதியாக தெரியாததால், இது தொடர்பாக பொலிசார் விசாரணை நடத்தி வருகின்றனர்.