தொடர்ச்சியான பணவீக்கம் எல்லா வகையிலும் பாதிக்கும்

புதுடில்லி–நாட்டின் தொடர்ச்சியான பணவீக்கம், அனைத்து வகைகளிலும் பாதிப்பை ஏற்படுத்தும் என, டாடா குழுமத்தின் தலைவர் சந்திரசேகரன் கூறி உள்ளார்.

‘டாடா கன்ஸ்யூமர் புராடெக்ட்ஸ்’ நிறுவனத்தின் ஆண்டு பொதுக் குழு கூட்டத்தின் போது, அவர் மேலும் கூறியதாவது:புவி சார் அரசியல் பதற்றங்கள், வினியோகத்தில் உள்ள சவால்கள் மற்றும் கச்சா எண்ணெய் உள்ளிட்ட பல பொருட்களின் தேவைக்கும், வினியோகத்துக்குமான இடைவெளி ஆகியவை நிலையான பணவீக்கத்தை உண்டாக்குகின்றன. இது பல்வேறு வகைகளில் தேவையை பாதிக்கும். இந்த நிச்சயமற்ற சூழலில், வலுவான செயல்பாட்டில் தொடர்ந்து கவனம் செலுத்த வேண்டும். மேலும், இந்த காலகட்டத்தில் கிடைக்கக்கூடிய வாய்ப்புகளைப் பயன்படுத்திக் கொள்ள வேண்டும்.இந்த புதிய சவால்கள், புதிய சிந்தனைகளுக்கும், சுறுசுறுப்பாக செயல்படவும், எதிர்காலத்தை கட்டியெழுப்பவும் நமக்கு வாய்ப்புகளைத் தந்துள்ளது. இவ்வாறு அவர் கூறியுள்ளார்.