மீண்டும் புதுப்பொலிவுடன் கலக்க வருகிறார் சக்திமான்!!

1990-களில் குழந்தைகளின் சூப்பர் ஹீரோ என்றால், சந்தேகமே வேண்டாம் அது சக்திமானாகத்தான் இருக்க முடியும். அந்த அளவுக்கு அந்த நிகழ்ச்சியின் தாக்கம் அனைத்து தரப்பினரையும் சென்றடைந்திருந்தது.

கேபிள்களில் புதுப்புது சேனல்கள், புதுப்புது நிகழ்ச்சிகள் என அணிவகுத்து வந்தாலும், வாரக்கடைசியில் சக்திமானை பார்ப்பதற்கு என இளசுகள் முதல் பெரியவர்கள் வரை காத்துக்கிடந்த காலம் அது. சக்திமான் கேரக்டரும், அதன் வெளிப்படையான இன்னொரு வெகுளித்தனமான கேரக்டரான பண்டிட் கங்காதர் என இருவேடங்களில் கலக்கிய முகேஷ் கண்ணாவுக்கு இந்தியா முழுவதும் ரசிகர் பட்டாளம் அதிகம்.

ஒவ்வொரு எபிசோடின் முடிவில் முகேஷ் கண்ணா கொடுக்கும் யோகா ரகசியங்கள், காய்கறிகள் சாப்பிட வேண்டும் போன்ற டிப்ஸ்களும் சீரியலின் சிறப்பு அம்சங்கள். பண்டிதர் கங்காதர் வித்யாதர் மாயாதர் ஓம்காரனாத் சாஸ்தியாக வரும் முகேஷ் கண்ணா, பின் அநீதியைக் கண்டு பொங்கி எழும் சக்திமானாக உருப்பெற்று தீயவற்றை எதிர்த்து சண்டையிடும் காட்சிகளால் பெரும் வரவேற்பை பெற்றது அத் தொடர்.

இந்நிலையில் சக்திமான் சீரியல் மீண்டும் புதிய பொலிவுடன் வரவிருப்பதாக தகவல்கள் வெளியாகி உள்ளது. இந்த புதிய பாகத்தில், சிறு வயது சக்திமான் பற்றியும் அவருக்கு சக்திகள் எவ்வாறு கிடைக்கப்பெற்றது என்பது பற்றியும் அதே சமயம் பழைய தொடர் எங்கே நிறுத்தப்பட்டதோ அங்கே இருந்து புது சீரியல் துவங்கப்படும் எனவும். இதற்காக டிடி சேனலில் மாலை 6 மணி முதல் 6.30 வரை ஒளிபரப்பு செய்ய பேசி வருவதாக இந்த சீரியலின் ஹீரோ முகேஷ் கண்ணா கூறியுள்ளார். இப்போது மீண்டும் சக்திமான் வருகிறார்.  இப்போதைய குழந்தைகள் மட்டுமின்றி, 90களில் குழந்தைகளாக இருந்த பெரும்பாலானவர்களுக்குத் தான் இதில் ஆதீத ஆர்வம் இருக்கும் என்பதில் ஆச்சர்யமில்லை.