மும்பைக்கு எதிராக அபார வெற்றி: கெய்ல் போன்ற வீரர் கிடைத்திருப்பது பெருமை..! பஞ்சாப் கேப்டன் ராகுல் நெகிழ்ச்சி

சென்னை: ஐபிஎல் கிரிக்கெட் தொடரில் சென்னை சேப்பாக்கம் மைதானத்தில் நேற்று இரவு நடந்த 17வது லீக் ஆட்டத்தில் நடப்பு சாம்பியன் மும்பை இந்தியன்ஸ்- பஞ்சாப் கிங்ஸ் அணிகள் மோதின. டாஸ் வென்ற பஞ்சாப் பந்துவீச்சை தேர்வு செய்தது.

இதையடுத்து முதலில் பேட்டிங் செய்த மும்பை 20 ஓவரில் 6 விக்கெட் இழப்பிற்கு 131 ரன் எடுத்தது. அதிகபட்சமாக கேப்டன் ரோகித் சர்மா 52 பந்தில் 5 பவுண்டரி, 2 சிக்சருடன் 63 ரன் எடுத்தார்.

சூர்யகுமார் யாதவ் 33, பொல்லார்ட் ஆட்டம் இழக்காமல் 16 ரன் எடுத்தனர். ஹர்த்திக் 1, குர்ணல்  3, இஷான் கிஷன் 6, டிகாக் 3 ரன்னில் ஆட்டம் இழந்தனர்.

பஞ்சாப் தரப்பில், ரவி பிஷ்னோய், முகமது ஷமி தலா 2 விக்கெட் வீழ்த்தினர். பின்னர் களம் இறங்கிய பஞ்சாப் அணியில் மயங்க் அகர்வால் 20 பந்தில், 4 பவுண்டரி, ஒரு சிக்சருடன் 25 ரன்னில்  வெளியேற கேப்டன் கே. எல். ராகுல்-கிறிஸ் கெய்ல் பொறுப்புடன் ஆடி அணியை வெற்றி பெற வைத்தனர்.

17. 4 ஓவரில் ஒரு விக்கெட் இழப்பிற்கு 132 ரன் எடுத்த பஞ்சாப் 9 விக்கெட் வித்தியாசத்தில் வெற்றி பெற்றது. கே. எல். ராகுல் 52 பந்தில் 3 பவுண்டரி, 3 சிக்சருடன் 60, கிறிஸ்கெய்ல் 35 பந்தில், 5 பவுண்டரி, 2 சிக்சருடன் 43 ரன் எடுத்து ஆட்டம் இழக்காமல் இருந்தனர்.

கே. எல். ராகுல் ஆட்டநாயகன் விருது பெற்றார். 5வது போட்டியில் 2வதுவெற்றியை பெற்ற பஞ்சாப்  பட்டியலில் 5வது இடத்திற்கு முன்னேறியது.

மும்பை 3வது தோல்வியை சந்தித்தது. வெற்றிக்கு பின் பஞ்சாப் கேப்டன் ராகுல் கூறியதாவது: மெதுவாக நாங்கள் ஒரு அணியாக ஒன்றாகி வருகிறோம்.

நாங்கள் இன்னும் ஒரு இளம் அணி. ஒவ்வொரு ஆண்டும் நாங்கள் புதிய தோழர்களை அழைத்து வருகிறோம்.

நாங்கள் பொறுமையாக இருக்க வேண்டும். நாங்கள் ஆதரித்த மற்றும் வாய்ப்புகளை வழங்கிய தோழர்கள் மெதுவாக பார்முக்கு வருகிறார்கள்.

ஹூடா மிகவும் சிறப்பாக விளையாடி வருகிறார், ஷாருக் நன்றாக பேட்டிங் செய்து வருகிறார், பிஷ்னோய் பந்து வீசிய விதம் அற்புதமானது. நானும் பயிற்சியாளரும் 2வது பேட்டிங் பற்றி நீண்ட நேரம் விவாதித்தோம்.

நாங்கள் முதலில் பேட் செய்த சில ஆட்டங்களில் பந்து வீச்சாளர்கள் எப்போதும் அழுத்தத்தில் இருப்பதை உணர்ந்தேன். அதனால்தான் முதலில் பவுலிங்கை தேர்வு செய்்தோம்.

ஒரு கட்டத்தில் ஒரு ரன் எடுப்பது கூட கடினமாக இருந்தது. ஆனால் யார் பந்தை அடிப்பது என்பதை கெய்ல் கண்டுபிடித்தார்.

அவரை போன்ற வீரரை கொண்டிருப்பது நன்மை, என்றார். நாங்கள் விரும்பும் வழியில் பேட்டிங் செய்யவில்லை.

மும்பை கேப்டன் ரோகித்சர்மா கூறியதாவது: நாங்கள் போதுமான ரன் எடுக்கவில்லை. இந்த பிட்ச்சில் பேட்டிங் செய்வது கடினமானது அல்ல என உணர்கிறேன்.

அதனால் தான் பஞ்சாப் 9 விக்கெட் வித்தியாசத்தில் வெற்றி பெற்றதை பார்த்தீர்கள். 150-160 ரன் பெற்றால் சவால் அளித்திருக்க முடியும்.

பஞ்சாப் பவுலர்கள் பவர்பிளேவில் நன்றாக பந்து வீசினர்.

கடந்த நான்கு ஆட்டங்களில் நாங்கள் பவர்ப்ளேயில் நன்றாக பேட் செய்தோம், ஆனால் இன்று நாங்கள் அவ்வாறு செய்யத் தவறிவிட்டோம்.

இசான் தூக்கி அடிக்க துடித்துக்கொண்டிருந்தார். ஆனால் அதை பெறமுடியவில்லை.

என்னால் கூட அடிக்க முடியவில்லை. நாங்கள் விரும்பும் வழியில் 20 ஓவர்களிலும் பேட்டிங் செய்யவில்லை.

ஸ்பினுக்கு எதிராக சிறப்பாக விளையாடும் போது நடுவில் யாராவது பேட் செய்ய வேண்டும் என்று நாங்கள் விரும்பினோம், சூர்யாவை அந்த வீரராக நாங்கள் அடையாளம் கண்டோம். அது வேலை செய்யும் போது நன்றாக இருக்கிறது, அது இல்லாதபோது மோசமாக தெரிகிறது.

ஆனால் நாங்கள் எடுக்கும் முடிவை நாங்கள் எப்போதும் ஆதரிக்கிறோம்.

நாங்கள் களத்தில் போதுமான முயற்சி எடுக்கவில்லை, நிலைமைகள் கடினமாக இருக்கும்போது நீங்கள் எப்படி பேட் செய்ய வேண்டும், எப்படி பந்து வீச வேண்டும் என்பதை புரிந்து கொள்ள வேண்டும், என்றார்.