அதிக வாடிக்கையாளர்களை ஈர்த்தது ‘ரிலையன்ஸ் ஜியோ’

புதுடில்லி:கடந்த மார்ச் மாதத்தில், அதிக எண்ணிக்கையிலான வாடிக்கையாளர்களை, ‘ரிலையன்ஸ் ஜியோ’ ஈர்த்துள்ளதாக, இந்திய தொலைதொடர்பு துறை ஒழுங்குமுறை ஆணையமான, ‘டிராய்’ தெரிவித்து உள்ளது.

இம்மாதத்தில், 79 லட்சம் வாடிக்கையாளர்களை ஜியோ கூடுதலாக பெற்றுள்ளது. இது, போட்டி நிறுவனங்களான, ‘பார்தி ஏர்டெல், வோடபோன் ஐடியா’ ஆகிய இரு நிறுவனங்கள் சேர்த்து பெற்ற எண்ணிக்கையை விட அதிகமாகும்.பார்தி ஏர்டெல் 40.5 லட்சம் வாடிக்கையாளர்களையும்; வோடபோன் ஐடியா 10.8 லட்சம் வாடிக்கையாளர்களையும் இம்மாதத்தில் கூடுதலாக பெற்றுள்ளன.

‘டிராய்’ தரவுகளின் படி, மார்ச் மாதத்தில் ரிலையன்ஸ் ஜியோவின் மொத்த வாடிக்கையாளர்கள் எண்ணிக்கை, 42.29 கோடியாக அதிகரித்து உள்ளது.ஏர்டெல் வாடிக்கையாளர் எண்ணிக்கை, 35.23 கோடியாகவும்; வோடபோன் ஐடியா வாடிக்கையாளர் எண்ணிக்கை, 28.37 கோடியாகவும் அதிகரித்துஉள்ளன.