வலுவான நடவடிக்கை தேவை அரசுக்கு சி.ஐ.ஐ., கோரிக்கை

புதுடில்லி, மே 4–

பெருந்தொற்றை கட்டுப்படுத்த வலுவான நடவடிக்கைகளை எடுக்குமாறு, இந்திய தொழிலக கூட்டமைப்பான, சி.ஐ.ஐ., அரசை வலியுறுத்தி உள்ளது. இது குறித்து, கூட்டமைப்பின் தலைவர் உதய் கோட்டக் கூறியிருப்பதாவது:இந்த இக்கட்டான சூழலில், மத்திய அரசு வலுவான நடவடிக்கைகளை மேற்கொள்ள வேண்டும். பொருளாதார செயல்பாடுகளை குறைப்பது உள்ளிட்ட அனைத்து நடவடிக்கைகளையும் மேற்கொள்ள வேண்டும் என, சி.ஐ.ஐ., விரும்புகிறது.தொற்றால் ஏற்படும் உயிரிழப்புகளை தடுப்பது, எல்லாவற்றிலும் முக்கியத்துவம் வாய்ந்ததாகும்.எனவே, மத்திய – மாநில அரசுகள், பொருளாதார செயல்பாடுகளுக்கு தடை விதிப்பது போன்ற நடவடிக்கைகளை மேற்கொள்ள வேண்டும்.மருத்துவ உள்கட்டமைப்புகள், வினியோக கட்டமைப்புகள் ஆகியவற்றை ஏற்படுத்துவதற்கு, அவசரகால அடிப்படையில் முயற்சிகள் எடுக்கப்பட வேண்டும். ஆனால், இதற்கு சற்று காலம் ஆகும் என்பதையும் புரிந்துகொள்ள வேண்டும்.இவ்வாறு அவர் கூறியுள்ளார்.