அமேசான் உடன் பிரியங்கா சோப்ரா பல மில்லியன் டாலர் ஒப்பந்தம்

பிரபல பாலிவுட் நடிகை பிரியங்கா சோப்ரா. அமெரிக்க பாடகர் நிக் ஜோனஸை திருமணம் செய்து கொண்டு அங்கேயே செட்டிலாகிவிட்டாலும் அவ்வப்போது இந்தியா வந்து செல்கிறார். மேலும் ஹாலிவுட்டின் சீரியல் மற்றும் படங்களிலும் நடித்து வருகிறார். இந்நிலையில் பிரபல ஆன்லைன் நிறுவனமான அமேசான் நிறுவனத்துடன் பல மில்லியன் டாலர் மதிப்பிற்கு டிவி சீரியல்கள் மற்றும் வெப்சீரிஸ் மாதிரியான தொடர்கள் தயாரிக்க ஒப்பந்தமாகி உள்ளார்.

இதுகுறித்து பிரியங்கா சோப்ரா கூறுகையில், இந்த செய்தியை உங்களுடன் பகிர்வதில் மகிழ்ச்சி. எனது பர்பிள் பெப்பிள் பிக்சர்ஸ் தயாரிப்பு நிறுவனம் மூலம், உலகம் முழுக்க திறமைகளை கொண்டவர்களை வைத்து சிறந்த படைப்புகளை உருவாக்குவதே நோக்கம். அமேசான் உடனான அடுத்த கூட்டு முயற்சிக்கு இது தான் அஸ்திவாரம். எனக்கு பக்கபலமாக இருக்கும் ஜெனிபர் சால்கே உள்ளிட்ட அமேசான் குழுவிற்கு நன்றி. புதிய சிந்தனைகளைத் தொடர்ந்து ஆராய்வதே எனது தேடல். நிறைய பணிகள் உள்ளன. எனது பயணத்தில் பெரும் துணையாக இருக்கும் ரசிகர்களுக்கும் இந்தநேரத்தில் நன்றி என்றார்.