தெலுங்கில் கிடைத்தது அங்கீகாரம்

மலையாளத்தில் இருந்து இறக்குமதியான, சுருட்டை முடி அழகி, அனுபமா பரமேஸ்வரனை, கொடி படத்துக்கு பின், ஒரு தமிழ் படத்தில் கூட பார்க்க முடியவில்லை. இதுகுறித்து, கோடம்பாக்கத்தில் விசாரித்தால், அம்மணிக்கு, தமிழ் படங்களில் நடிக்க, அவ்வளவு ஆர்வம் இல்லை என்கின்றனர். அவரது முழு கவனமும், தற்போது தெலுங்கு படங்களில் தான் உள்ளது. ஷதமனம் பவதா என்ற படத்தில், சர்வானந்த் ஜோடியாக நடிக்கிறார். இந்த படம், பொங்கலன்று திரைக்கு வருகிறது. இதுவரை தெலுங்கில், அவர் இரண்டு படங்களில் நடித்துள்ளார். இவற்றில், இரண்டாவது ஹீரோயின் வாய்ப்பு மட்டுமே கிடைத்தது. இந்நிலையில், ஷதமனம் பவதா படத்தில், முதல் முறையாக, பிரதான ஹீரோயினாக நடித்து உள்ளார். இதுதவிர, எவடு ஒக்கடு என்ற படத்திலும் நடிக்கிறார். இதனால், 'இப்போதைக்கு தமிழ் படங்கள் வேண்டாமே' என, கோலிவுட்டில் இருந்து பேசும் தயாரிப்பாளர்களிடம் உதட்டை பிதுக்குகிறாராம் அனுபமா.