அமேசான் வர்த்தகத்தை முறியடிக்க பிளிப்கார்ட்டில் வால்மார்ட் முதலீடு
புதுடில்லி : வால்மார்ட் நிறுவனம், பிளிப்கார்ட்டில், 100 கோடி டாலர் முதலீடு செய்ய திட்டமிட்டுள்ளது.
பிளிப்கார்ட்டின், இணையதளத்தை பயன்படுத்துவோர் எண்ணிக்கை, 10 கோடியை தாண்டியுள்ளது. இதையடுத்து, இந்தியாவில், இணையதள வணிகத்தில், அந்த நிறுவனம் முன்னணியில் உள்ளது. சமீபத்தில், அந்த நிறுவனத்தின் மதிப்பு, 160 கோடி டாலரை தாண்டியுள்ளது.
வால்மார்ட், மிட்டல் பார்தி என்டர்பிரைசஸ் உடன் இணைந்து, இந்தியாவில், 10 ஆண்டுகளுக்கு முன், சில்லரை வணிகத்தில் நுழைந்தது. கடந்த, 2013ல், வால்மார்ட், தனியாக சில்லரை வணிகத்தில் ஈடுபட முடிவு செய்தது. இந்த நிலையில், அந்த நிறுவனம், பிளிப்கார்ட்டில், 100 கோடி டாலர் முதலீடு செய்ய திட்டமிட்டுள்ளதாக தகவல் வெளியாகி உள்ளது. இதன் மூலம், இரு நிறுவனங்களும், இணையதள வணிக நிறுவனமான, அமேசானை எதிர்கொள்ள முடிவு செய்துள்ளதாக தெரிகிறது.