தனுஷ் படத்துக்கு மீண்டும் இசையமைக்கிறாரா ஏ.ஆர்.ரஹ்மான்?

தனுஷ் நடிப்பில் ‘கொடி’ படத்தின் படப்பிடிப்பு முடிவடைந்து இறுதிக்கட்ட பணிகள் விறுவிறுப்பாக நடைபெற்று வருகிறது. இதைத்தொடர்ந்து தனுஷ், கவுதம் மேனன் இயக்கும் ‘எனை நோக்கி பாயும் தோட்டா’ படத்தில் பிசியாக நடித்து வருகிறார்.

இப்படத்தின் படப்பிடிப்புகள் தற்போது பொள்ளாச்சியில் விறுவிறுப்பாக நடைபெற்று வருகிறது. இப்படத்தின் இசையமைப்பாளர் யார் என்பது இதுவரை அறிவிக்கப்படாமலே இருந்து வந்தது.

தனுஷுக்கு தொடர்ந்து ஹிட் பாடல்களை கொடுத்த அனிருத், அல்லது கவுதம் மேனனுக்கும் தொடர்ந்து ஹிட் பாடல்களை கொடுத்த ஹாரிஸ் ஜெயராஜ் இருவரில் யாராவது ஒருவர் இப்படத்திற்கு இசையமைப்பாளராக ஒப்பந்தமாவார்கள் என கூறப்பட்டது.

ஆனால், தற்போது ஹாரிஸ் மற்றும் அனிருத் கைவசம் நிறைய படங்கள் இருப்பதால், இவர்கள் இந்த படத்துக்கு ஒத்துக் கொள்வார்களா? என்ற சந்தேகம் எழுந்துள்ளது. எனவே, கவுதம் மேனனுக்கு ஏற்கெனவே பெரிய ஹிட் கொடுத்த ஏ.ஆர்.ரஹ்மானையே இந்த படத்திற்கு இசையமைப்பாளராக போட்டுவிடலாமா? என்ற பரிசீலனையில் படக்குழுவினர் இறங்கியுள்ளனர்.

அனேகமாக இந்த படத்திற்கு ஏ.ஆர்.ரஹ்மான் இசையமைப்பார் என்றும் படக்குழுவினருக்கு நெருங்கிய வட்டாரங்களில் கூறப்படுகிறது. எனினும், இதுகுறித்து அதிகாரப்பூர்வமான செய்தி விரைவில் வெளியாகும் என எதிர்பார்க்கப்படுகிறது.

இப்படத்தில் தனுஷுக்கு ஜோடியாக மேகா ஆகாஷ் நடிக்கவிருக்கிறார். ராணா டகுபதியும் முக்கிய கதாபாத்திரத்தில் நடிக்கிறார் என்பது குறிப்பிடத்தக்கது.