5 கோடி கடந்த வாயாடி பெத்த புள்ள

சிவகார்த்திகேயன் தயாரிக்கும் முதல் படம் கனா. இதனை அவரது நண்பர் அருண்ராஜா காமராஜ் இயக்குகிறார். சத்யராஜ், ஐஸ்வர்யா ராஜேஷ் நடிக்கிறார்கள். திபு நினன் தாமஸ் இசை அமைத்துள்ளார்.

இந்தப் படத்தில் தந்தை மகள் உறவை சொல்லும் வாயாடி பெத்தபுள்ள என்ற பாடலை சிவகார்த்திகேயன், அவரது மகள் ஆராதனா மற்றும் வைக்கம் விஜயலட்சுமி பாடியுள்ளனர். இந்த பாடலின் லிரிக் வீடியோ யு-டியூப்பில் வெளியிடப்பட்டது. அதனை இதுவரை 5 கோடிக்கும் அதிகமான பேர் பார்த்திருக்கிறார்கள். இதுகுறித்து சிவகார்த்திகேயன் கூறியதாவது:

சில நேரங்களில், நாம் எதிர்பாராத நல்ல விஷயங்கள் நடந்து நம்மை மகிழ்ச்சியில் ஆழ்த்தும். அப்படி வாயடைத்து போகும் அளவுக்கான அன்பை இசையின் காதலர்கள் மற்றும் ரசிகர்கள் வாயாடி பெத்த புள்ள பாடலுக்கு வழங்கியிருக்கிறார்கள். தந்தை, மகள் உறவையும், அவர்களின் மகிழ்ச்சியான தருணங்களையும் சொல்லும் இந்த பாடல் இசையமைப்பாளர் திபு நினன் தாமஸ் மற்றும் பாடலாசிரியர் ஜி.கே.பி ஆகியோரின் கூட்டு முயற்சிக்கு கிடைத்த வெற்றி.

என் மகள் ஆராதனாவுடன் எனக்கு இருக்கும் உறவை காலம் முழுக்க நினைக்க, கிடைத்த இந்த பாடலுக்காக அவர்களுக்கு நன்றியைத் தெரிவித்துக் கொள்கிறேன். பாடலை பாடிய வைக்கம் விஜயலட்சுமி அவர்களுக்கு நன்றி. ஆராதனாவின் அழகிய குரல் இந்த பாடலின் இனிமைக்கு முக்கிய காரணமாக அமைந்திருக்கிறது. எல்லாவற்றுக்கும் மேலாக, என்னையும், என் மகள் ஆராதனாவையும் இந்த ஒரே பாடலில் பாட வைக்கும் யோசனையை கொண்டு வந்த என் நண்பரும், திரைப்பட இயக்குனருமான அருண்ராஜா காமராஜிற்கு நன்றி கடன்பட்டிருக்கிறேன்.

இவ்வாறு சிவகார்த்திகேயன் கூறினார்.