முஷ்பிகுர் சதம் வீண்; ஆஸி.,யிடம் வீழ்ந்தது வங்கம்

நாட்டிங்காம்: வங்கதேச அணிக்கு எதிரான உலக கோப்பை லீக் போட்டியில் வார்னர் சதம் விளாச, ஆஸ்திரேலிய அணி 48 ரன்கள் வித்தியாசத்தில் வெற்றி பெற்றது.

இங்கிலாந்து மண்ணில் ஐ.சி.சி., உலக கோப்பை கிரிக்கெட் தொடர் நடக்கிறது. இதில் இந்தியா, நியூசிலாந்து உள்ளிட்ட 10 அணிகள் பங்கேற்கின்றன. நாட்டிங்காமில் நடந்த லீக் போட்டியில் 'நடப்பு சாம்பியன்' ஆஸ்திரேலியா, வங்கதேசம் அணிகள் மோதின. 'டாஸ்' வென்ற ஆஸ்திரேலிய அணி பேட்டிங் தேர்வு செய்தது.

ஆஸ்திரேலிய அணியில் ஷான் மார்ஷ், பெஹ்ரன்டர்ப், ரிச்சர்ட்சன் நீக்கப்பட்டு காயத்திலிருந்து மீண்ட ஸ்டாய்னிஸ், ஜாம்பா, கூல்டர் நைல் வாய்ப்பு பெற்றனர். வங்கதேச அணியில் சைபுதின், மொசாதக்கிற்குப்பதில் சபிர் ரஹ்மான், ருபைல் ஹொசைன் இணைந்தனர்.

அபார துவக்கம்:

ஆஸ்திரேலிய அணிக்கு கேப்டன் பின்ச், வார்னர் ஜோடி அபார துவக்கம் தந்தது. பொறுப்பாக ஆடிய பின்ச் அரைசதம் கடந்தார். முதல் விக்கெட்டுக்கு 121 ரன்கள் சேர்த்தபோது, பின்ச் (53) ஆட்டமிழந்தார். எதிரணி பந்துவீச்சை சிதறடித்த வார்னர், ஒரு நாள் அரங்கில் 16வது சதம் அடித்தார். இது, நடப்பு உலக கோப்பை தொடரில் இவர் அடித்த இரண்டாவது சதம். வார்னர் 166 ரன்களில் அவுட்டானார். கவாஜா (89) அரை சதம் கடந்தார். மேக்ஸ்வெல் (32) ரன் அவுட்டானார். ஸ்மித் (1) ஏமாற்றினார்.

ஆஸ்திரேலிய அணி 49 ஓவரில் 5 விக்கெட்டுக்கு 368 ரன்கள் எடுத்திருந்தபோது, மழை குறுக்கிட்டது. மீண்டும் துவங்கிய போட்டியில் ஸ்டாய்னிஸ் விளாச, ஆஸ்திரேலிய அணி 50 ஓவரில் 5 விக்கெட்டுக்கு 381 ரன்கள் குவித்தது. ஸ்டாய்னிஸ் (17), கேரி (11) அவுட்டாகாமல் இருந்தனர்.

முஷ்பிகுர் சதம்:

கடின இலக்கை விரட்டிய வங்கதேச அணிக்கு சவுமியா சர்கார் (10) ஏமாற்றினார். சாகிப் 41 ரன்கள் எடுத்தார். தமிம் (62) அரை சதம் கடந்தார். முஷ்பிகுர், மகமதுல்லா பொறுப்புடன் செயல்பட்டனர்.

கூல்டர் 'வேகத்தில்' மகமதுல்லா (69), சபிர் (0) அடுத்தடுத்து சிக்கினர். முஷ்பிகுர் சதம் விளாசினார். முடிவில், வங்கதேச அணி 50 ஓவரில் 8 விக்கெட்டுக்கு 333 ரன்கள் மட்டும் எடுத்து வீழ்ந்தது. முஷ்பிகுர் (102) அவுட்டாகாமல் இருந்தார்.