வரி சீர்திருத்தக் குழு பணிக் காலம் நீட்டிப்பு

புதுடில்லி: நேரடி வரி சட்டத்தில் சீர்திருத்தங்கள் செய்வது தொடர்பாக, மத்திய அரசால் அமைக்கப்பட்ட, செயல் திட்டக் குழுவின் பணிக் காலம், மேலும் இரண்டு மாதங்களுக்கு நீட்டிக்கப்பட்டுள்ளது.


மத்திய அரசு, 50 ஆண்டுகளுக்கு முன் இயற்றப்பட்ட, வருமான வரி சட்டத்தில் சீர்திருத்தம் செய்வதற்கான பரிந்துரைகளை வழங்க, செயல் திட்டக் குழு ஒன்றை, 2017 இறுதியில் அமைத்தது.அதனிடம், உலக நாடுகளில் பின்பற்றும் வருமான வரி நடைமுறைகளையும், நாட்டின் பொருளாதார வளர்ச்சியையும் கருத்தில் கொண்டு, புதிய வருமான வரி வரைவு அறிக்கை தயாரிக்கும் பணி ஒப்படைக்கப்பட்டது.இக்குழு, அதன் பரிந்துரையை வழங்குவதற்கான காலம், மூன்று முறை நீட்டிக்கப்பட்டு, வரும், 31ம் தேதியுடன் முடிவடைய உள்ளது. இந்நிலையில், இக்குழுவின் பணிக் காலம், ஜூலை, 31 வரை நீட்டிக்கப்பட்டுள்ளதாக, மத்திய நிதியமைச்சகம் வெளியிட்ட அறிக்கையில் தெரிவிக்கப்பட்டுள்ளது.