ஜோகன்னஸ்பர்கில் இன்று முதல் டி20 போட்டி

ஜோகன்னஸ்பர்க்: இந்தியா - தென் ஆப்ரிக்கா மோதும் முதல் டி20 போட்டி, ஜோகன்னஸ்பர்க் நியூ வாண்டரர்ஸ் மைதானத்தில் இந்திய நேரப்படி இன்று மாலை 6.00 மணிக்கு தொடங்குகிறது.தென் ஆப்ரிக்காவில் சுற்றுப்பயணம் மேற்கொண்டுள்ள இந்திய அணி, டெஸ்ட் தொடரை 1-2 என்ற கணக்கில் இழந்தாலும், அடுத்து நடந்த ஒருநாள் போட்டித் தொடரில் 5-1 என வென்று சாதனை படைத்தது.அடுத்து 3 போட்டிகள் கொண்ட டி20 தொடர் நடக்கிறது. இதிலும் கோஹ்லி தலைமையிலான இந்திய அணி ஆதிக்கம் செலுத்தும் என எதிர்பார்க்கப்படுகிறது.டுமினி தலைமையில் களமிறங்கும் தென் ஆப்ரிக்க அணியில் 3 புதுமுக வீரர்கள் இடம் பெற்றுள்ளனர். ஒருநாள் தொடரில் அடைந்த படுதோல்விக்கு பழிதீர்க்கும் முனைப்புடன் அந்த அணி வரிந்துகட்டுவதால் இன்றைய ஆட்டத்தில் அனல் பறக்கும் என்பதி சந்தேகமில்லை.* இரு அணிகளும் மோதியுள்ள சர்வதேச டி20 போட்டிகளில் இந்தியா 6-2 என முன்னிலை வகிக்கிறது. * இதுவரை 100 டி20ல் விளையாடி உள்ள தென் ஆப்ரிக்கா 59 வெற்றி, 40 தோல்வி கண்டுள்ளது. * சர்வதேச டி20ல் 2000 ரன் எடுத்த முதல் இந்திய வீரர் என்ற பெருமையை பெற கோஹ்லிக்கு இன்னும் 43 ரன் தேவை.இந்தியா: கோஹ்லி (கேப்டன்), ரோகித், தவான், ரெய்னா, மணிஷ் பாண்டே, டோனி, ஹர்திக், தினேஷ் கார்த்திக், கே.எல்.ராகுல், அக்சர் பட்டேல், பூம்ரா, புவனேஷ்வர், குல்தீப், சாஹல், ஷர்துல் தாகூர், ஜெய்தேவ் உனத்காட்.தென் ஆப்ரிக்கா: ஜே.பி.டுமினி (கேப்டன்), பர்கான் பெகார்டியன், ஜூனியர் டாலா, டி வில்லியர்ஸ், ரீஸா ஹெண்ட்ரிக்ஸ், கிறிஸ்டியன் ஜாங்க்கர், ஹெய்ன்ரிச் கிளாசன் (விக்கெட் கீப்பர்), டேவிட் மில்லர், கிறிஸ் மோரிஸ், டேன் பேட்டர்சன், ஆரோன் பாங்கிசோ, பெலுக்வாயோ, டாப்ரைஸ் ஷம்சி, ஜான் ஜான் ஸ்மட்ஸ்.