கமல் கையால் கோல்டன் ஸ்டார் விருது பெற்ற துல்கர் சல்மான்

மலையாள திரையுலகம் மிகவும் பெருமையாக கருதும் 25-வது ஏசியாநெட் திரையுலக விருது வழங்கும் விழா சில தினங்களுக்கு முன் நடைபெற்றது. மலையாள திரையுலக நட்சத்திரங்கள் பலரும் கலந்து கொண்ட இந்த விழாவில் நட்புக்காக, தமிழ்நாட்டில் இருந்து நடிகர்கள் கமல், நதியா, தமன்னா, ஆகியோர் கலந்து கொண்டு மலையாள ரசிகர்களையும் திரையுலகையும் ஆச்சர்யப்பட வைத்தார்கள்..

மேலும் இந்தவிழாவில் விருதுபெற்ற பலருக்கும் தன் கையால் விருது வழங்கினார் கமல். கடந்த வருடத்திற்கான ஏசியாநெட் கோல்டன் ஸ்டார் விருதை கமல் கையால் பெற்றுக்கொண்டார் துல்கர் சல்மான். இது விருது வழங்கும் விழா என்றாலும் விருது பெற்றவர்களை விட அதிக கவனத்தை ஈர்த்தது சமீபத்தில் கண் சிமிட்டல் மூலமாக பிரபலமான புருவ அழகி பிரியா வாரியர் மற்றும் ரோஷன் ஜோடி தான்.