மின் வாகன பாகங்கள் தயாரிப்பில் சுந்தரம் பாஸ்ட்னர்ஸ் நிறுவனம்
சென்னை : டி.வி.எஸ்., குழும நிறுவனங்களில் ஒன்றான, சுந்தரம் பாஸ்ட்னர்ஸ் நிறுவனம், மின் வாகனங்களுக்கான பாகங்கள் தயாரிப்பில் களமிறங்கி உள்ளது. இவற்றுக்கான ஆர்டரை, அமெரிக்காவைச் சேர்ந்த, மின் கார் தயாரிப்பில் ஈடுபடும், ‘டெஸ்லா’ நிறுவனத்திடம் இருந்து பெற்றுள்ளது.
இது குறித்து, சுந்தரம் பாஸ்ட்னர்ஸ் நிறுவனத்தின் நிர்வாக இயக்குனர், சுரேஷ் கிருஷ்ணா கூறியதாவது: மின் வாகனங்களுக்கான கியர்கள், ரேடியேட்டர் டேங்க் மூடிகள் தயாரிப்பில் ஈடுபட்டு உள்ளோம். இந்தியாவில், 2030ல், மின் கார் பயன்பாட்டை பரவலாக்க, மத்திய அரசு இலக்கு நிர்ணயித்து உள்ளது. எனினும், இக்கால கட்டத்தில், உலகளவில், மின் வாகனங்களின் பங்கு, 8 சதவீத அளவிற்கே இருக்கும் என, மதிப்பிடப்பட்டு உள்ளது.
அதற்கேற்ப, நிறுவனத்தின் வர்த்தகத்தில், 15 சதவீதம், மின் வாகன பாகங்கள் தயாரிப்பாக இருக்கும். அதே சமயம், 2040ல், சர்வதேச அளவில், மின் வாகனங்களின் பயன்பாடு, 30 – 40 சதவீதமாக உயரும். அதனால், வாகன உதிரி பாகங்கள் தொழிலில் ஈடுபட்டுள்ள நிறுவனங்கள், மின் வாகனங்களுக்கு தேவையானவற்றையும் தயாரிக்கும் திறனை உருவாக்கிக் கொள்வது அவசியம். இவ்வாறு அவர் கூறினார்.