கால்சீட் பிரச்சினையால் விஜய் பட வாய்ப்பை இழந்த ஸ்ரீதிவ்யா!

சிவகார்த்திகேயனுடன் ரஜினிமுருகன் படத்தில் நடித்து பிரபலமானவர் ஸ்ரீதிவ்யா. அதன்பிறகு ஜீவா, வெள்ளைக்காரதுரை, காக்கி சட்டை, ஈட்டி, காஷ்மோரா என பல படஙக்ளில் நடித்தவர், தற்போது சங்கிலி புங்கிலி கதவ தொற படத்தை முடித்து விட்டு, அதர்வாவுடன் ஒத்தைக்கு ஒத்த படத்தில் நடித்துக்கொண்டிருக்கிறார். இந்நிலையில்,நேற்று முன்தினம் சென்னையில் நடைபெற்ற சங்கிலி புங்கிலி கதவ தொற படத்தின் ஆடியோ விழாவில் கலந்து கொண்டார் ஸ்ரீதிவ்யா.

அப்போது ஸ்ரீதிவ்யாவின் நடிப்பு குறித்து பெருமையாக பேசிய அப்பட தயாரிப்பாளரான டைரக்டர் அட்லி, எனக்கு ஸ்ரீதிவ்யாவின் நடிப்பு ரொம்ப பிடிக்கும். அதனால்தான் எனது படத்தில் நடிக்க அவரிடம் கால்சீட் கேட்டேன். ஆனால் அவர் அதே தேதியில் வேறு படத்தில் கமிட்டாகியிருந்ததால் என் படத்தில் நடிக்க முடியாமல் போய் விட்டது. என்றாலும் எனது தயாரிப்பில் நடித்து விட்டார் என்றார்.

ஆனால், எந்த படத்தில் கால்சீட் இல்லாமல் ஸ்ரீதிவ்யா நடிக்கவில்லை என்பதை அட்லி கூறவில்லை. அதுகுறித்து ஸ்ரீதிவ்யா தரப்பை கேட்டபோது, விஜய்யின் 61வது படத்தில் வயதான விஜய்க்கு ஜோடியாக நடிக்கயிருந்த ஜோதிகா கடைசி நேரத்தில் விலகியதைத் தொடர்ந்து, பல நடிகைகளிடம் கால்சீட் கேட்டாராம் அட்லி. அதில் ஸ்ரீதிவ்யாவும் ஒருவராம். ஆனால் அவர் கேட்ட தேதியில் அதர்வாவுடன் ஒத்தைக்கு ஒத்த படத்தில் நடிக்க கால்சீட் கொடுத்திருப்பதாக கூறி விட்டாராம் ஸ்ரீதிவ்யா. அதன்பிறகுதான் நித்யாமேனனை ஒப்பந்தம் செய்தாராம் அட்லி.