ரஜினிகாந்தின் காலா கரிகாலன் படப்பிடிப்பு மும்பையில் இன்று தொடங்கியது... வைரலாகி வரும் படங்கள்

சென்னை: நடிகர் ரஜினிகாந்தின் காலா கரிகாலன் படப்பிடிப்பு இன்று மும்பையில் தொடங்கியது. அதில் ரஜினிக்கு பா.ரஞ்சித் காட்சிகளை விளக்குவது போன்றும் ரஜினிகாந்த் இடம்பெற்ற காட்சிகளும் வைரலாக பரவி வருகிறது.

ரஜினியின் 164-ஆவது படத்தின் பெயர் காலா கரிகாலன் என்று கடந்த வியாழக்கிழமை வெளியிடப்பட்டது. அன்று மாலையே படத்தின் பர்ஸ்ட் லுக் போஸ்டரும் வெளியானது. இதைத் தொடர்ந்து வழக்கம் போல் ரஜினி ரசிகர்கள் அந்த படங்களை ஸ்டிக்கர்களாக அச்சடித்து தங்கள் வாகனங்களில் ஒட்டி கொண்டு வலம் வருகின்றனர்.

ரஜினியின் அரசியல் பிரவேசத்தால் மகிழ்ச்சியில் உள்ள ரசிகர்கள் புதிய படம் தொடக்கத்தால் மேலும் குஷியாகி உள்ளனர். இந்த படத்தை நடிகர் தனுஷின் வுண்டர்பார் பிலிம்ஸ் தயாரிக்கிறது. கபாலி படத்தை இயக்கிய பா.ரஞ்சித்தே , காலாவையும் இயக்குகிறார்.

படப்பிடிப்பில் கலந்து கொள்ள ரஜினி காந்த் நேற்று சென்னையிலிருந்து மும்பைக்கு புறப்பட்டு சென்றார். படப்பிடிப்புகள் இன்று தொடங்கப்படும் என்று அறிவிக்கப்பட்டபடி தொடங்கியது. அதில் ரஜினிக்கு ரஞ்சித் காட்சிகளை விளக்குவது போன்ற படமும், சமுத்திரக்கனி உள்ளிட்ட நடிகர்கள் ரஜினியுடன் நடிப்பது போன்ற புகைப்படங்கள் சமூகவலைதளங்களில் பரவியுள்ளன. இதனால் ரசிகர்கள் மகிழ்ச்சி அடைந்துள்ளனர்.

பொருத்தமான வரன் தேடுகிறீர்களா? தமிழ்மேட்ரிமோனியில் பதிவு இலவசம்!